Dotal smy sydom žnjeńskich krónow wili. Z nimi smy so jónu na wokrjesnym a šěsć króć na krajnym wubědźowanju wo najrjeńšu krónu wobdźělili: 2008 w Halštrowje, 2009 w Biskopicach, 2012 w Sebnicy, 2016 w Torgau, 2018 w Coswigu, 2020 w Drježdźanach a 2022 w Žitawje. A kóždy raz bu naša króna jako najrjeńša hódnoćena.

Na wobrazu widźimy žnjeńsku krónu z lěta 2016.

Kak nastanje žnjeńska króna? »

Kóždolětnje wopytamy ptačokwasne předstajenje Serbskeho ludoweho ansambla w Chrósćicach a nowu serbskorěčnu inscenaciju Němsko-Serbskeho ludoweho dźiwadła w Budyšinje. Nimo toho wabimy za dalše wubrane zarjadowanja, kotrež serbske institucije w Budyšinje poskićuja.

Organizujemy wulěty k zeznaću blišeje wokoliny runje tak kaž do srjedźneje Łužicy wokoło Slepoho a do Delnjeje Łužicy.

28. apryla kóždeho lěta přijědu turisća a wójnscy weteranojo z Pólskeje, zo bychu při pomniku swojim w boju wo wuswobodźenje wot fašizma padnjenym krajanam česć wopokazali. Zo bychmy našich hosći hódnje witali, wurjedźimy cyły areal wokoło pomnika. Do swjedźenja Božeho ćěła resp. folklorneho festiwala rjedźimy tež zelenišća při Hórnikowej dróze.

Čehodla bu pomnik postajeny? »

Jakubowy puć wjedźe přez Chrósćicy »

Kóžde druhe lěto wita Budyšin folklorne skupiny z cyłeho swěta na Mjezynarodny folklorny festiwal "Łužica - Lausitz - Lusatia".

Sobotu wotewrja burske dwory w Chrósćicach z programami rejowanskich a hudźbnych skupin swoje wrota. Pohosćimy wopytowarjow zbliska a zdaloka z kulinariskimi chłóšćenkami.

Njedźela započina so z wjacorěčnej swjedźenskej Božej mšu. Popołdnjo prezentuja so wobdźělnicy w swjedźenskim ćahu přihladowarjam.

Adwent je čas, w kotrymž so křesćanstwo na swjedźeń naroda Jězusa Chrystusa, na hody, přihotuje. Na předwječorju 1. adwenta započina so tež nowe cyrkwinske lěto.

Kóždolětnje wijemy adwentny wěnc za cyrkej a přeprošujemy wobydlerjow našeje wsy, so na předwječoru 1. adwenta pod zaswěćenej adwentnej pychu při dujerskej hudźbje na dohodowny čas nastajić.

Naše towarstwo bu 21. januara 2003 z dźewjeć čłonami załožene. Prěni předsyda běše Marko Jurk. Wón skutkowaše 13 lět w tutym zastojnstwje.

Mjeztym je towarstwo na 52 čłonow rozrostło. W lěće 2016 bu Franc Čornak jako předsyda wuzwoleny. Zhromadnje z Dianu Cyžowej, Marianom Korjeńkom, Evu Kušinej a Ignacom Wjeselu nawjeduje wón naše towarstwo.

Serbske wjesne towarstwo "Domizna" Chrósćicy je čłon Domowiny – Zwjazka Łužiskich Serbow z. t.

» Wustawki.pdf

Wjeselimy so wězo přez kóždeho noweho čłona. Chceće-li našemu towarstwu přistupić, wupjelńće próstwu wo čłonstwo a posrědkujće ju Francej Čornakej.

Lětny přinošk wučini 20 €.

» Próstwa wo čłonstwo.pdf

Serbske wjesne towarstwo "Domizna"
Franc Čornak
Při pastyrni 2
01920 Chrósćicy

e-mail: info[at]domizna.net