Wuběr rěčow:

Přednošk wo Malawiju

 

Wutoru, dnja 14. nowembra 2017, witachmy Christinu Smolinu ze Swinarnje. Wona rozprawješe nam wo swojim skutkowanju w jednym z dźesać najchudšich krajow Afriki, w Malawiju.

W lěće 2012 spjelni so jej són, kotryž měješe hižo jako šulerka. Wona poda so na lěto do Malawija, zo by tam chudym pomhała. W měsće Madisi dźěłaše jako wučerka. Jeje šulerjo běchu přewažnje syroty. W 5. lětniku, w kotrymž běše něhdźe 80 šulerjow rozdźělneje staroby, podawaše hudźbu, sport a biologiju. Dokelž njewobknježachu dźěći dosć derje jendźelšćinu,  nawukny młoda Serbowka jich rěč: chichewa.

W prózdninach pomhaše w tamnišej chorowni, tež pytajo za swójskim powołanskim wusměrjenjom. Tam so rozsudźi, powołanje baby nawuknyć. Spočatk tutoho lěta poda so znowa do Malawija, tutón raz do Namitete, zo by w chorowni swj. Gabriela měsacaj jako baba dźěłała.

Při tutym „pućowanju do Afriki” wuwědomi so nam něhdźe 50 wopytowarjam wječorka zaso jónu hoberski rozdźěl mjez našim žiwjenjom tu w Němskej a tym w Africe. Zo bychmy znajmjeńša tróšku pomhać móhli, nahromadźichmy něšto pjenjez, kotrež chce Christina Smolina při přichodnej składnosći do Malawija posrědkować.


 

 

 

Mój čas w Malawiju

Pod tutym titulom rozprawja Christina Smolina w swojim blogu » wo swojich nazhonjenjach a dožiwjenjach w jednym z najchudšich krajow swěta.