Přihot na adwent

Wiće adwentneje pychi za nawjes a adwentneho wěnca za cyrkej

Štwórtk wječor do 1. adwenta: Kowarnja so spěšnje pjelni, kóždy namaka sej swoje městno. Ći jedni přitřihaja hałžki, ći tamni je podawaja a dalši wija je do wěnca abo na železne krosno. Dwě hodźinje pozdźišo je dźěło zdokonjane. Adwentna pycha donjese so na nawjes a wěnc do cyrkwje. Kowarnja so wumjeće, blida a ławki so zestajeja a hižo steji słódny bouilon na blidźe. K tomu sydaja šmałcowe pomazki z kisałej kórku a rybičkowe całty. Při bjesadźe z dobrej kapku planuje so dźěło za sobotu.

Stajenje adwentneje pychi

Sobotu dopołdnja so adwentna pycha na nawsy staji. Wšitko so tak připrawi, zo so při ćmičkanu w najrjeńšej pyše zaswěći. Popołdnju přihotuja so budki za horce wino a kołbaski, blida a ławki so stajeja a wšitko so z hałžkami a swěčkami rjenje wudebi.

Zaswěćenje adwentneje pychi

Na předwječoru 1. adwenta zaswěća so swěcy adwentneje pychi. K tomu zanjesu dujerjo adwentnu hudźbu. Mnozy přińdu, popřeja sej hornčk horceho wina, słuchaja na hudźbu, bjesaduja a wohrěwaja so při wohenjach.

"Přihotuj so, luba duša, nětk na přichad Jězusa ..."

Tak přeprosychmy lětsa k druhemu razej na zhromadne zahajenje adwenta. Dujerjo postarachu so wo přijomnu dohodownu atmosferu.