Wuběr rěčow:
Žnjenski wěnc a žnjenskej krónje
Krajna domchowanka měješe so lětsa poprawom w Oelsnitz/Vogtlandska wotměć. Koronoweje pandemije dla bu wona tam na přichodne lěto přesunjena. Tuž so jako nowa městnosć za wubědźowanje wo najrjeńšu žnjensku krónu a najrjeńši žnjenski wěnc Sakskeje Křižna cyrkej w Drježdźanach wuzwoli. K prěnjemu razej wotmě so wubědźowanje z tym w jednej ze sakskich metropolow. Tole bě dobra składnosć, skedźbnosć města a swojich hosći na tutón starodawny nałožk we wjesnych kónčinach a wuznam ratarstwa wusměrić.
Za nas bě to składnosć, so lětsa zaso na wubědźowanju wobdźělić. Tak zetkachmy so wot 19. awgusta tydźensce srjedu a štwórtk w farskej garaži k wiću. Njeměješe pak jenož nowa žnjenska króna nastać. Prěni raz chcychmy so - na iniciatiwu Astrid Kuhnoweje - tež ze žnjenskim wěncom na wubědźowanju wobdźělić, kotrež wotmě so wot 29.09. hač do 04.10.2020.
Próca bu bohaće mytowana - wobaj eksponataj wobsadźištej prěnje městno! To je najrjeńši dźak wšitkim pilnym pomocnikam a darićelam, kotřiž maja podźěl na nastaću žnjenskeho wěnca a žnjenskeje króny. Naša žnjenska króna debješe po tym jako dobyćerska króna Saksku statnu kencliju.
Skónčnje smy hišće dalšu krónu za Dom swj. Ludmile w Chrósćicach wili. Tak móžachmy wobydlerjow, sobudźěłaćerjow a wopytowarjow tam zwjeselić.
